كيكة الفواكه على طريقة الكسالى 😴
مساء الخير /صباح الخير 💛 حسب توقيتكم :)
اليوم جبت لكم وحدة من تخبيصاتي المستوحاة من مجموعات وصفات و مضروبين في وصفة وحدة .
كيكة الفواكه على طريقة الكسالى
بدون سكر و لا تفكرو تضيفوه لها و إلا راح تهلكوا من الحلاوة و ما بتقدرو تاكلوها
المكونات :
موزتين
تفاحة وحدة كبيرة (نقطعها بدون تقشير اذا ما تحبو القشر مشروعا عادي)
5 او 3 تمرات ( اي تمر ينفع)
3 تينات مجففة (اغسلوها قبل لا تخلطونها مع الخليط)
ملعقة طعام و نص لوز مجروش
ملعقة طعام و نص بذر القرع الأخضر (اذا عندكم)
رشة ملح
نص ملعقة مستخلص الفانيليا
كوب و نص جوز الهند المبشور غير محلى
ملعقتين و نص طحين الحمص ( استعملوا اي طحين ثاني لو ما عندكم او عندكم مشاكل مع البقوليات )
كوب حليب إلا ثمن (يعني باقي شوي على الفل)
ملعقة طعام لبنة بدون ملح (يفضل)
الطريقة:
نضيف جميع المكونات في الفرامة الكهربائية او الخلاط و نفرمهم لحد ما يصير عندنا خليط متجانس. ( الخليط ما يكون صافي راح تلاحظون وجود الياف التمر و التفاح و هذا شي عادي )
نصبه في قالب مقاس 8 انش مغطى بورق الخبز (ورق الزبدة ، مهمة هذي الخطوة عشان لا تلصق في القالب )
ندخلها الفرن على درجة حرارة 180c° لمدة 30 دقيقة تقريبا.
نراقبها اول ما تعدي 20 دقيقة عشان نتأكد اذا استوت او لا.
تكون جاهزة اذا صارت ذهبية شوي على الحواف.
*.
ملاحظة مهمة : اتركوها تبرد تماماً تماماً في القالب ، لأنها راح تتفتت لو حاولتو تنقلوها لطبق التقديم قبل ما تبرد.
اول ما تبرد تنقلوها لطبق التقديم و هي مقلوبة شيلو ورق الزبدة بشويش.
و بس .
عليكم بالعافية لو عجبتكم 🙂💙
ليست هناك تعليقات:
إرسال تعليق